KUCHING: Sarawak nengah SMD Semiconductor nyerungkai peluang negap kerejasama strategik enggau Hong Kong ba bidang meranak puku, semikonduktor, deep technology enggau teknologi pemungkal ke bukai.
Pengawa nya dikerandau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg begulai enggau SMD Semiconductor sereta Gobi Partners, ditu kena Hari Dua.
Ku Datuk Patinggi Abang Zohari, kerejasama nya ulih nyadi pemun ngagai kerejasama besai agi entara Sarawak enggau Hong Kong, kelebih agi ba bidang teknologi strategik.
"Kitai berati ke pengulih ungkup Sarawak enggau Hong Kong nanggam kerejasama tegap agi enggau timpuh panjai ba bidang semikonduktor, deep technology enggau teknologi strategik bukai seraya nempa peluang ngagai kededua raban ngambi bagi ba pemansang ekonomi teknologi serantau, " ku iya ba sebengkah penerang SMD.
Entara bidang kerejasama ti diserungkai nyengkaum ngelala pemeranak puku institusyen, bekuasa enggau strategik sereta peluang meranak puku begulai enggau sindikasi ungkup kompeni semikonduktor sereta deep technology.
Kerejasama nya mega nyerangkung pengawa meranak puku strategik ba kompeni pemungkal enggau kompeni teknologi ti benung mansang ba renggat serantau enggau antarabansa kelimpah untung sereta komersial reta intelek enggau teknologi strategik.
Nangkan nya, Chairman SMD Semiconductor, Dato Sri Wan Lizozman Wan Omar madah, tanggam kerejasama nya ngempuru dua ekosistem ti ngembuan pengelebih enggau bela ngenap.
“Hong Kong bisi pengelebih ti tegap ba bidang wang, puku enggau inovasyen seraya Sarawak benung ngemansang penauba sektor semikonduktor, infrastruktur digital enggau teknologi.
"Pengawa ngempung pengelebih tu ulih ngerandang peluang baru ungkup kededua ekosistem, " ku iya.
Bakih Kunsi Pengatur Pengawa di Gobi Partners Malaysia, Jamaludin Bujang mega madah, Sarawak ulih ngena rentayan Gobi ba makit Asia, kelebih agi Asia Barat dikena ngulihka akses ngagai teknologi pemadu baru.
Ku iya, Gobi ti udah meranak puku ba lebih 400 kompeni teknologi sepanjai 24 taun ti udah sereta disukung sekeda agih belanja ba rantau nya ulih nyaup Sarawak ngerumban atur transformasyen teknologi.
Nambah ke nya, Tuai Pegawai Eksekutif SMD Semiconductor, Shariman Jamil madah, SMD deka meri perati dikena ngelala bidang kerejasama ti ulih ngena pengelebih kededua raban sereta bisi rega komersial enggau strategik.
"Ba SMD, pengawa bukai iya nya ngelala sukut ti nentuka pengelebih kami enggau bakih kunsi ulih bela ngenap sereta ngelala palan ngemansang peluang ti bisi rega komersial enggau strategik ti nyata," ku iya. - EDISI UKAS
